على إسم مصر التاريخ
زّعَّق بعلو الصوت
محتار يسجل ضلالة
أو ناس.. بالرصاص .. بتموت

مسك التاريخ القلم
ما عِرِفْش إيه يكتب

يعني يعيد نفسه
و الا يقضيها كِذْب

صرخ التاريخ صرخه 
و قال بلاش مسخرة

زعَّق
 يا خلق إفهموا
ازاي حتمشوا لـ ورا

  شطب اللي كتبه
  و قال
صفحتكوا دي مغَبَّرَة

من دولة الخناشير
لدولة الطراطير
احكوا لي عاللي جرى

لملم هزايمه و قال
انا آخري كدة معاكو
و احترت وياكوا


حتى التاريخ اشتكى
من ناس في غيبوبة

دولام  تمامهم رغيف
اسمر و أنبوبة

بالعربي و المختصر
آدي حكاية شعب

إن جه في يوم و إنتفض
انه يكمل صعب

بقلمي
ب ش ر ى

ما زلت ابحث عن أمل
دوماً و ابداً لن أَمِلَّ
اَلْهَث وراء ..

أَي أمل
كل أمل

عَلِّى أَجِدْه
حَتْمًا أجده

فلربما ..صادفته

في حُلم إِكْتَمَل
في جُرْح إِنْدَمَل
في قَلْب إحتمل
...
انا
لن يغادرني اﻷمل
انه يوما قريبا
يأتي اﻷمل

بقلمي
ب ش رى

كلموني عن بلادي
اوصفولي جمالها اكتر
بيقولوا تمشي ف دروبها
تشم ريحة تقول دي عنبر
و الا مسك الله اعلم
حاجة حلوة الله اكبر
قلت امشي اشوف بنفسي
لقيت بلادي ريحتها دم
و الشوارع و المباني
تحس انها شايلة هم
من عموم القسوة فيها
تلقى عتمة و ظلم عَم

إيه جرالك يا بلادي
ماله شعبك .. صابُه ايه
كان يشوف أخوه في زنقه
يسيب مصالحه و يجري عليه
دلوقتي يفرح في المصيبه
و الشماتة.. مالية.. عينيه

نفسي اقولك يا بلادي.. كلمتين
زعلانة منك............
عايزة باخرة و الا قارب
اركبه و يبعدني عنك
و انسى عمر قضيته فيكي
و القلب لو .. ملهوف عليكي
أرميه في بير و أقفل عليه
نفسي انسى حلم مات
عايزة أدفن ذكرايات
عشتها...  و رابطاني بيكي

الزمن يا بلادي.... عارفة؟
من ذهوله ......ساعته واقفة
مش مصدق انك انتي
من حثالة الدنيا خايفة

كلمتين يمكن يكونوا
هما آخر كلمتين
الحكاية مش فتوة
يخطفك ما اعرفش فين
الحكاية انك انتي
ما تعرفيش قيمة اللي صانك
بتعشقي تراب اللي خانك
و تترمي ف حضن اللي سَـجَـنك
و اللي هَـانِـك
حاسة انك برة سجنه
تايهة مش عايشة ف مكانك
أو زمانك

ب ش ر ى

بقلمي 
بشـرى محمد